Tāne
 Nesta página se gasta una ortografía destinta ala que normalmenti se gasta ena Güiquipedia. |
'Tāne', es unu de los diosis más popularis y más adoráus pa las islas del salienti de la Polinesia, volucionandu de diferentis maneras en ca archipiélagu.
En Hawaii Edital
En Hawaii, Kāne (el fonema protopolinesiu /t/ despareció en hawaiianu envertiéndussi en /k/) se consideraba el más importanti de los cuatru diosis hawaiianus prencipalis: Kāne, Kanaloa, Kū y Lono. Era el dios de la procriación, el criaol y el que da la vida, y se l'envinculaba cona amanecía, el sol y el cielu. Se reconoci a Kāne comu el dios supremu que dimanó de la escuridá eterna (pō) pa jormal los cielus y la tierra. En muchas versionis, l'ayuarun en essu los diosis Kū y Lono, y la tierra acibi el nombri de "la gran tierra de Kāne" (ka honua nui a Kāne). Prantó el sol, la luna y las estrellas enos cielus, y conos co-criaoris que lo ayuarun jormó al hombri y la mujel. El cultu a Kāne estaba mu destendíu y dessistin muchus epítetus añidíus al su nombri al mentallu enas oracionis.
En Nueva Zelanda Edital
En Nueva Zelanda, Tāne es el hiju de Rangi (pairi celestial) y Papa (la mairi tierra). Entre los sus hermanus están los diosis Rehua, Tū (Kū en Hawaii), Rongo (Lono en Hawaii), Tangaroa (Kanaloa en Hawaii), Tāwhirimātea y otrus. Aquí es un dios de los bosquis. Nel mitu de la creación maorí, Tāne jue l'únicu entre los sus hermanus escapás de desapartal a sus pairis el cielu y la tierra pa dejal qu'entrara la lus. Comu dios güenu y dios de la lus, Tāne mandó a Tū, Rongo y a tolos espíritus rebeldis dende los cielus pabaju pa la escuridá de Kai-hewa. Tāne crió al primel hombri (Tiki) y la primel mujel (Hine-hau-one), y pola maldá de los mortalis, les mandó el grandi charpaddu (comu el Dios bíblicu).