Avissu
Esti endilgui ebi sel revissau por un corretol.
Halobacteria.jpg

Las arqueas son un grupu de micruorganismus unicelularis que, al igual que las baterias, tinin morfología procariota (sin núcleu ni, en general, orgánulus membranosus internus), peru son fundamentalmenti diferentis a estas, de manera que conhorman su propiu dominiu i reinu únicu.

Nel pasau las arqueas huerun crasificas cumu baterias procariotas emarcas nel antigu reinu Monera i rezibían el nombri se arqueubaterias, peru esta crasificación ya nu se gasta. En realia, las arqueas tinin una estoria volutiva endependienti i muestran muchas diferenzias en su bioquímica con las otras hormas de vía, polu que se crasificarun enun dominiu separau dentru del sistema de tris dominius: Archaea, Bateria i Eukaryota.

Las arqueas son un dominiu (i tamién un reinu​) que se dividi en cincu filus reconocius, peru se están identificandu ca vez más. De estus grupus, Crenarchaeota i Euryarchaeota son los más estudiaus. La crasificación delas arqueas entovía es difícil, porque la gran mayoría nunca se ain estudiau nel laboratoriu i solu se ain detetau meyianti análisis de las sus ácius nucleicus en muestras tomas del ambienti.

Las arqueas i baterias son bastanti similaris en tamañu i horma, anque argunas arqueas tienin hormas mu extrañas, cumu las células aplanas i cuairas.​ A pesal de esta semejanza visual con las baterias, las arqueas posin genis i varias rutas metabólicas que son más cercanas a las delos eucariotas, en especial enas enzimas implicas nela transcrición i la traución. Otrus aspetus dela bioquímica delas arqueas son únicus, cumu los éteris lipicus de sus membranas celularis. Las arqueas explotan una variea de recursus muchu mayoris que los eucariotas, endi compuestus olgánicus comunis cumu los azúcaris, hata el gastu e amoníacu,​ ionis e metalis o enclusu hidrógenu comu nutrientis. Las arqueas tolerantis a la sal (las haloarqueas) gastan la luz solal cumu huenti de energía, i otras espezis de arqueas gastan carbonu, sin embargu, a diferencia delas prantas i las cianobaterias, nu se conozi nenguna especii de arquea que sia capaz de ambas cosas. Las arqueas se reproducin asexualmenti i se dividin pol hisión binaria, fragmentación o gemación; a diferencia delas baterias i los eucariotas, nu se conozi nenguna especii de arquea que hormi esporas.

Inicialmenti, las arqueas eran consideras toas metanógenas o extremófilas que vivían en ambientis ostilis talis comu áuguas termalis i lagus salaus, peru oguañu se sabi que están presentis enos más diversus abitats, talis comu el suelu, océanus, pantanus, campus i enclusu nel colon umanu. Las arqueas son especialmenti numirosas enos océanus, i las que horman parti del plancton podrían sel unu delos grupus e olganismus más abondantis del praneta. Oguañu se consideran una parti importanti de la vía ena Tierra i podrían desempeñal un papel importanti tantu nel ciclu del carbonu cumu nel ciclu del nitrógenu. Nu se conozin ejemplus clarus de arqueas patógenas o parásitas, peru suelin sel motualistas o comensalis. Son ejemplus las arqueas metanógenas que vivin nel intestinu delos umanus i los rumiantis, ondi están presentis en grandis cantiais i contribuyin a digeril el alimentu. Las arqueas tinin su importancia ena tenología, tamién existin metanógenus que son gastaus pal producil biogás i cumu parti del procesu de deporación de áuguas, i las enzimas de arqueas extremófilas son capazis de resistil temperaturas elevas i disolventis orgánicus, siendu pol ellu gastas en biotenología.