Cornalvu
Cornalvu es un embalsi romanu assitiau a unus 10 quilómetrus de Méria, i al mesmu tiempu, tamién se llama Cornalvu al Parqui Natural ondi s'alcuentra iziu embalsi.
Lo primeru que se puei vel el parqui es el centru d'entelpretación, enas aldehueras de Truhillanus. Tras unus quilómetrus pol un caminu asfaltau chegaremus al Parqui Natural i el embalsi (si acontinamus p'alantri, chegaremus a unas hesas propieá la Hunta d'Estremaura).
La presa es una eificación romana sobri el arroyu Albarregas, que se gastaba p'abastecel d'áugua a parti la ciá d'Emerita Augusta (ogañu ciá e Méria). La contención es una muralla e 220 metrus de largu pol 18 d'artu, siendu la parti que s'alcuentra en contatu con el áugua en horma e graeriu. Esta costrución hue decrará Monumentu Nacional el 13 e Diciembri e 1912, inque el embalsi s'acontina gastandu ena atualiá.
El su entornu es un Parqui Natural, razón pola que goça e proteción especial de la Hunta de Estremaura endi 1988, i pol supuestu, posei una rica frora i fauna.
Parti el embalsi el riu Alhucén, riu típicamenti mediterráneu con un emportanti estiahi que prevoca qu'en vranu quei secu a tramus i la via acuática se concentri en poças i chabarcas, llamás "charcas madre" (chabarcas mairi).
Es mestel izil que nesti riu s'alcuentra una especi e pezi llamá harabugu, la cual está en continua regresión i solu quean en angunus lugaris de riu Guadiana (paci sel que nel Guadalquivil ya s'án estinguiu).