Atila (395 - 453) hue'l últimu i mas poerosu caudillu de los hunus, tribu proceenti probablementi d'Ásia, enque los sus origin esatus son desconocius. Atila gobelnó el mayol emperiu uropeu del su tiempu, dende el 434 ata la su muerti en 453. Las sus posesionis s'estendian dende la Uropa Central ata el Mari Negru, i dende el riu Danubiu ata el mari Bálticu. Duranti el su reinau hue unu de los mayoris enemigus del Emperiu Romanu, que en esta etapa final del mesmu estava deeviu en dos: El Emperiu Oriental con capital en Constantinopla, ogañu Estambul, i el Emperiu Ociental, con capital en Roma i mas tardi en Rávena. Envadió dos vezis los Balcanis, estuvu a puntu de tomal la ciá de Roma i llegó a sitial Constantinopla. Marchó pla Galia ata llegal a Orleans, pero el general romanu Aeciu le venció ena batalla de los Campus Cataláunicus en el 451 i tuvu que retroceel.