Fabula Atellana

La fabula Atellana "fábula d’Atela" era un héniru dramáticu romanu de farsa bulresca.

Orihin

Los nombris qu’alcibi esti héniru hazin referéncia al sítiu andi supuestamenti tuvun nacéncia. El nombri mas usual es el de Atellana "atelana", de la ciá la Campaña Atela, calificandu al ámpriu télminu fabula "palranga". Otru nombri que tamién alcibi es el de huegus oscus (en latín ludi Osci) pol estal escrebias a los escomiençus ena palra osca dessa ciá. Toa esta nomenclatura demuestra el orihin nu romanu el héniru, el qual hue emportau a Roma pal 391 e. C.

Caraiterística el héniru

L’atelana era un teatru bulrescu, oscenu i gaçaparullu andi participaban pressonahis-tipu cumu el Bobela (Macchus), el Boquiqui (Bucco), el Hampón (Manducus), el Chungón (Sannio) i el Verdihondu (Pappus) que representaban a lo bahu la socieá.

Era a lo primeru, cumu otrus hénirus dramáticus, emprovisau, anque endispués se huerun holmandu autoris que las escrebian. Amás, con el prestíhiu que hue cobrandu el latín, los pressonahis bulronis palraban en oscu, mentri que los demás bichaban en latín. A comparáncia con el drama satíricu griegu, las atelanas s’arrepresentaban endispués la sessión trahédias. Los atoris viahaban en carrucha en presentación en presentación, que acostumbraban sel unus quatru en escena.

Autoris i obras

Cautivarun el héniru várius autoris, pero pol heitu que tinian pocas án siu las enteracionis i testus llegaus al tentu. Se dis que Sila escrebió anguna paí. Obras de las que abemus títulus son:

• Nóviu: Macchus exsul, Gallinaria, Surdus, Vindemiatores, Parcus.
• Lúciu Pompóniu: Macchus miles, Pytho Gorgonius, Pseudoagamemnon, Bucco adoptatus, Aeditumus.

Otrus autoris menus mentaus huerun Fábiu Dorsenu i Mémiu, esti úrtimu demaseau bastu i indecenti pa los autoris crássicus. Siguramenti Plautu tamién cautivara paí esti héniru.