Garganta los Infiernus

La reserva natural “Garganta los Infiernus” (oficialmenti en castellanu, Garganta de los Infiernos), es un espaciu natural protehiu, assitiau al norti la Caçris, nel estremu ociental de la Sierra e Greus.

Reserva natural “Garganta los Infiernus”.

Assitiamientu

La reserva s´alcuentra entri la vertienti noroesti e la Sierra e Tormantus, la vertienti suroesti e la Sierra e Greus i riu Herti. Assitiá ena caecera e la comarca el Valli el Herti, es el puertal d´acesu a la Comuniá Autónuma d´Estremaura endi la província d´Ávila.

Descrición

Garganta los Infiernus.

La reserva cuenta con abondus sartus d'áugua, arroyus, piscinas naturalis u grandis pozas escavás pola erosión circulal el augua e los rius. Los elevaus éndicis d´umeá contribuyin a la su vezi a potencial una vehetación de gran valol ecolóhicu con ecosistemas de bosqui caucifoliu, bosqui e ribera, piornalis serranus i pastizalis alpinus. La fauna es autótuna i mu abundanti, albergandu varias especis en peligru d´estinción.

Clima

El clima ofreci emportantis contrastis en hunción de la artitú. En heneral, las temperaturas nu son estremas, abundandu los invielnus moeradamenti frius i los vranus argu calurosus. Las precipitacionis el lugal oscilan entri 1.500 i 2.000 mm. anualis, siendu frecuenti en invielnu la ñevi enas cumbris serranas.

Vehetación

Ena Garganta los Infiernus, ebiu a la variación artitudinal que oscila entri los 600 i 2.000 metrus, alcuentramus una diversa vehetación:

• • Bosquis Caucifolius: Con árbus cumu el robli, el espinu, el madroñu, el castañu u el cerezu.
  • Bosquis de Ribera: La abundancia e cursus d´augua crea numerosas zonas úmeas de las que se aprovechan especis arbúrias cumu el alisu, el fresnu i el sauci. En menol cantiá, peru de gran emportancia pola su escasés, especis protehias cumu el tehu, el azevu i el abedul.
  • Pastizalis alpinus: Enas cumbris se horman pastizalis alpinus enus que s´alcuentra el alpi, la henciana, el brezu i el azafrán serranu.
  • Piornalis serranus: El piornal es un matorral adatau a condicionis aversas, que creci enas zonas artas ondi pol temperatura u pol composición el suelu, es dificultosu alcuentral otra vehetación.

Fauna

Lagartija.

Ebiu a la diversiá e pequeñus microclimas pola deferencia d´arturas de la reserva, las especis son numerosas i mu distintas entri sí. El gatu montés, la hineta, la nutria, la cabra montés i el estrañu desmán (un mamíferu e costumbris acuáticas al que es mu ralu vel). Entri las avis, alcuentramus el mirlu, el arrendahu, la oropéndola, la abubilla i el rabilargu. Rapacis cumu el águila rial, el butri leonau, el búhu rial, el alcón peregrinu, el milanu, el gavilán, el azol, el alcón abeheru i el águila ratonera. Es mestel destacal la cibueña negra, inque seya cá vezi mas escasa.

Enlacis esternus

• En Commons ai conteníu multimedia sobre Garganta los Infiernus.
• Oficina e turismu d´Estremaura
• Oficina e turismu el Valli el Herti