Canadian Aboriginal Syllabics Example.svg Nesta páhina se gasta una ortografia destinta a la que normalmenti se gasta ena Güiquipeya.
Gulás húngaru

El gulás es un guisiju de carnis y verduras guisáu con pimentón (paprika) y algotras especias con variantis apaicías en sitius veddinus. Se destaca pola colol colorá que le da el pimentón. Es un pratu que recréi d'Hungría y se considera un símbulu d'aquel país, pero tamién dessisti en muchus otrus paísis uropéus.

El nombri vieni del húngaru "gulyás" ( ['guja:ʃ] ) qu'es un términu pa mental al vaqueru, caporal o ganaeru típicu húngaru que guarda ganáu bovinu montáu a caballu. Al guisiju se lo llamaba "gulyáshús" (carni de gulyás), pero se queó comu gulyás y hogañu la palabra vali pa mental lo mesmu'l vaqueru que'l guisu. De patrás ena puszta (las zonas esteparias d'Hungría) se criaba muchu ganáu, que se llevaba pa las ferias de ganáu que se celebraban enas cidáis importantis de los paísis veddinus.

La manera d'aviallu varía. Los agredientis prencipalis son la carni (de vaca, ternera, guarru, oveja o caballu), las verduras (cenorias, tomatis, colinabus, raíddis de perejil, pimientus, etc...) cebolla y pimentón (imprescindibli). Se pue añidil aju y cominu. Tamién puei lleval roanjas de patatas o col agria (chucrú).