Jenófani de Colofón (en griegu, Ξενοφάνης ὁ Κολοφώνιος, IPA [ksenophánɛːs ho kolophɔ́ːnios]) hue un rassoda, filósofu i teólogu griegu.

Via Edital

Jenófani tuvu nacéncia en Colofón, ciá costera jónia i pátria Minermu, nel 570 e. C. Hue iju de Déssiu u quiziá de Ortomeni, sigún las huentis. Tuvu qu’emigral quandu nuevu pa Sicília de qu'el sátrapa Jarpagu hizu molleal polas armas las ciais jónias d’Ásia minol en nombri Ciru. En Sicília, hormi dis Diógeni Laérciu, vivió en Zancli i en Catánia i se l’atija tamién a Elea, anque no de ciertu. Los dossógrafus lo consieran el hundaol la escuela eleática, tuviéndulu enclusu pol maestru Parménidi sigún los endirguis proceentis d’Aristóteli i su discípulu Teofrastu hechus pol supuestus pahius nel pensaeru, probabrimenti d’intepretacionis posterioris.

La verdá es que vivió andurreandu la isla i trapiqueandu paí cumu recitaol enas furrionas aristocráticas, siempri con ánimu libri i sin compricacionis.

Se desconoci el tratu que mantuvu con Simónidi de Ceus, quasi de la mesma quinta que Jenófani, pos namás dessisti una referéncia (DK 21 B 21) ena que lo llama "horruñu". Tamién mienta paí a Pitágora, a Tali i a Epiménidi.

Obra Edital

La obra que mos á llegau de Jenófani está, a la escontra la costumbri jónia, en velsu qu’alquiria las holmas el dísticu , del essámetru enclusu paí de yambus. Angunas huentis assiguran llamalsi esta obra Περὶ φύσεως "Al tentu la naturaleza", anque es çorçoleanti esti bichu, pos velequí, una las precupacionis hundamentalis el recitaol de Colofón era la teologia, no la física.

Pensaeru Edital

El pensaeru Jenófani es críticu cona tradición: disprestígia la conceción que se tien los deportistas frenti al trebajaol u el pensaol, arremeti contra los diosis oméricus i consiera que es pol mé el envestigaeru comu se llega al conocimientu, pos los diosis nu hizun entriega dél a los ombris.

Pensaeru teológicu Edital

Jenófanis afilma que los ombris án tiniu el marru de hazel a los diosis comparantis a ellus de má qu'án ahorrau los sus defeutus tamién a los seris supremus. Pa él, a la escontra, aberia un dios qu'en ná huera apaiciu ni a los ombris ni a los diosis la tradición, inmobi i que tó lo sienti i tó lo puei. Esti pensaeru unitáriu i inmobi hizu a la tradición endispués acolleralu al eleu Parménidi.

Pensaeru físicu Edital

El pensaol jóniu creyó al Sol estal holmau pol cachinus de huegu u de nubis inflamás que, veloquí, s’ajuntan tolos dias. Destas mesmas nubis están holmás tolas demás estrellas, arreparandu Jenófani en que dambas a dos cosas —estrellas i Sol— s’alcuentran hechas duna mesma cosa. Eno tocanti a la movición los astrus, assiguró qu’el Sol abança εἰς ἄπειρον pero que pol longol dende la Tierra paici que va jechandu el reol.

Jenófani iju qu’el mari es la huenti el áugua, los airis i los rius. Comparanti al pensaeru minorasiáticu, consieró que tós nacemus de la tierra i el áugua.

Bibliografia Edital

  • Diels, H., Die Fragmente der Vorsocratiker, Berlín, 19526.
  • Fränkel H., Poesía y filosofía de la Grecia Arcaica, trad. Ricardo Sánchez Ortiz de Urbina, Visor, Mairil, 1993.
  • Kirk, G. S., Raven, J. E., Schofield, M., Los filósofos presocráticos, trad. J. García Fernándes, Mairil, Gredos, 19872.


Filósofus pressocráticus

Autoris: Tali de MiletuAnassimandruAnassímeniPitágoraFilolauEraclituJenófaniParménidiZenón de EleaEmpédocliAnasságoraLucipuDemócrituProtágoraGórgiaTrasímacuCaricliCrítiaPródicuÍpiaAntifontiLicofrón

Guipal mas endirguis al tentu...