Landeru

Un motol de landeu es un sistema enhormáticu qu'endiça archivus assitiaus en sirvioris web. Un sabulugal son los landerus d'Internet (angunus landean solu ena Web, peru algotrus landean tamién en News, Gopher, FTP...) cuandu se pii enhormación al tentu angún tema. Los landeus se hazin con parabras cravi u con arbus herálquicus pol temas; el resurtau el landeu es un listau de direcionis Web enos que s'almientan temas relacionaus colas parabras cravi landeás. Se puein crasifical en dos:

Éndicis temáticus: Son sistemas de landeu pol temas u categorias heralquiçás (inque tamién suelin encruil sistemas de landeu pol parabras cravi). Se trata e basis de datus de direcionis Web criás "manualmenti", es izil, ai presonas que s'encargan d'assitial ca páhina web a una categoria u tema eterminau.

Motoris de landeu: Son sistemas de landeu pol parabras cravi. Son basis de datus qu'encorporan autumáticamenti páhinas web pol mé "robots" de landeu ena redi.

Cumu furrulan en horma autumática, los motoris de landeu contienin heneralmenti mas enhormación que los diretórius. Sin embargu, estus úrtimus tamién án de costruilsi a partil de landeus (nu autumatiçaus) u bien a partil d'avisus daus polos criaoris de páhinas (lo cual puei sel mu arrayanti). Los güenus diretórius mesturan dambus los dos sistemas.

Crasis de landerus

Landerus herálquicus (Arañas u Spiders)

La mayol parti los grandis landerus entrinacionalis d'usu abitual i conocius son d'esti tipu. Son mestel albondus recursus pal su huncionamientu. Nu están al arcanci de cualisquiá.

Acorrin las páhinas arrecohiendu enhormación al tentu los contenius las páhinas. Cuandu se landea una enhormación enos motoris, ellus consurtan la su basi e datus i presentan resurtaus crasificaus pola su emportáncia. De las webs, los landerus puein arrecohel dendi la páhina prencipal (portá u index), a tolas páhinas que s'alcuentrin nel sirviol.

Si se landea una parabra, pol sabulugal, “ordenaoris”. Enos resurtaus que ofrecerá el motol de landeu, apaicirán páhinas que contengan esta parabra en anguna parti el su testu.

Si consiera qu'un sítiu web es emportanti pal usuáriu, suelin rustrilas toas. Si nu se crei emportanti, solu se rustri una u mas páhinas.

Ca ciertu tiempu, los motoris revisan las webs, pa atualiçal los contenius la su basi de datus, polo que nu es ralu que los resurtaus del landeu nu estén atualiçaus.

Los landerus herálquicus tiinin un conhuntu e pogramas simpris i potentis con deferentis finaliais. Se suelin deviil en tres partis. Los pogramas qu'escrucan la redi -arañas (spiders)-, los que costruyin la basi e datus i los qu'el usuáriu gasta, el pograma que landea ena basi e datus.

Si se paga s'otieni un bonu que premitirá apaicel enas primeras páhinas de resurtaus. Hata el momentu, aparentementi, esta horma e publiciá, es endicá esplícitamenti. Esta crasi e publiciá es mestel enos landerus herálquicus pa puel acontinal ofreciendu el servíciu de bardi a los usuárius.

Sabulugaris d'Arañas: Google, MSN Search, AltaVista, Hotbot, GlowBoom, Opera , Mozilla Firefox.

Diretórius

Una tenulohia barata, ampriamenti gastá pol una tupa scripts nel mercau. Nu son mestel albondus recursus d'enhormática. En cambeu, es mestel mas soporti umanu i mantenimientu.

Los algorimus son albondu mas simpris, presentandu la enhormación sobri los sítius rustrius cumu un conhuntu e diretórius. Nu acorrin las páhinas web ni emburacan los sus contenius. Solu rustrin angunus los datus de la páhina, cumu el entítulu i la descrición que s'entri nel momentu e rustril el sítiu nel directóriu.

Los resurtaus del landeu estarán determinaus pola enhormación que s'aiga aportau al diretóriu cuandu se rustri la web. En cambeu, a deferéncia los motoris, son revisás pol operaoris umanus, i crasificás sigún categorias, de horma qu'es más faci alcuentral páhinas del tema del muestru enterés.

Mas que landeal enhormación al tentu contenius de la páhina, los resurtaus sedrán presentaus haziendu referéncia a los contenius i temática el sítiu.

La su tenulohia es mu barata i sencilla.

Sabulugaris de diretórius: Antigus diretórius, Open Directory Project, Yahoo!, Terra (Antigu Olé). Uguañoti, dambus los dos gastan tenulohia e landeu herálquica, i Yahoo! conserva el su diretóriu. Buscar Portal, es un diretóriu, i la mayol parti los motoris ispanus son diretórius.

Mesturaus Landeru - Diretóriu

Amás de tenel caraterísticas de landerus, presentan los sítius web rustrius en catálogus sobri contenius, pol sabulugal enhormática, curtura, socieá i al mesmu tiempu, se deviin en susecionis.

Metalanderus

Premiti hazel várius landeus en motoris selecionaus respetandu el hormatu orihinal de los landerus. Lo que hazin es realizal landeus en auténticus landerus, analizan los resurtaus de la páhina, i presentan los sus própius resurtaus.

FFA - Atijus de bardi pa tos

FFA (acrónimu el ingrés "Free For All"), páhina d'atijus de bardi pa tos. Cualisquiá puei añiil la su páhina duranti un tiempu eterminau nestus pequeñus diretórius. Los atihus nu son tentigus.

Landerus de Portal

Bahu esti entítulu s'alcuentran los landerus específicus de sítiu, aquellus que landean enhormación solu nel su portal u sítiu web, i pudrian sel consieraus cumu un diretóriu.

Landerus verticalis

Landerus especialiçaus nun setol concretu, lo que les premiti analizal la enhormación con mayol desatitú, disponel de resurtaus mas atualiçaus i ofrecel al usuáriu herramientas de landeu avançaus.

Estória

El primel landeru hue "Wandex", un éndici (ogañu desapaiciu) realizau pola World Wide Web Wanderer, un robot esarrollau pol Mattew Gray nel MIT, en 1993. Otru de los primerus landerus, Aliweb, tamién apaició en 1993 i entovia está en huncionamientu. El primel motol de landeu de testu compretu hue WebCrawler, que apaició en 1994. A deferéncia los sus predecesoris, ésti premitia a los sus usuárius un landeu pol parabras en cualisquiel páhina web, lo que chegó a sel un estandal pala mayol parti los landerus. WebCrawler hue tamién el primeru en dalsi a conocel ampriamenti pol púbricu. Tamién apaició en 1994 Lycos (qu'encetó ena Carnegie Mellon University).

Mu plontu apaicierun albondus mas landerus, cumu Excite, Infoseek, Inktomi, Northern Light i Altavista. D'angún mó, competian con diretórius (u éndicis temáticus) popularis cumu Yahoo!. Mas tardi, los diretórius s'entegrarun u se añierun a la tenulohia e los landerus pa umental la su huncionaliá.

Enantis de la chegá de la Web, desistian motoris de landeu pa otrus protocolus u usus, cumu el landeru Archie, pa sítius FTP anónimus i el motol de landeu Verónica, pal protocolu Gopher.

Uguañoti s'aprécia una tendéncia los prencipalis landerus d'internet a dal el sartu a entornus móvilis criandu una nueva heneración de landerus: los landerus móvilis.

Landerus en estremeñu

Nu se puei izil que desista un "gran" landeru que premita landeal enhormación en estremeñu, peru sí desistin pequeñus proyeutus.

El primel landeru en estremeñu hue el "Linci", criau en 2007 pol EstremaWeb. Se trataba dun landeru basau en Google que hazia que solu huera posibri landeal en páhinas en estremeñu (siendu añiias éstas manualmenti). El proyeutu nu tinia ánimu e lucru, razón pola que s'evitaba la posibri publiciá, i amás del landeru en estremeñu, ofrecia landeal en tola redi, u landeal notícias enos prencipalis perioicus d'Estremaura. Entri los prencipalis pobremas del "Linci", es mestel destacal los marrus al landeal parabras que fruhieran "ñ" u tirdis.

Pocu endispués, el 7 jeneru de 2008, apaició la velsión en prebas del landeru Wikia Search, siendu criá la velsión en estremeñu d'esti landeru el dia 13 d'esi mesmu mes.

Google

Alreol de 2001, el landeru Google encetó a tomal emportáncia. El su désitu estaba basau en parti nel concetu e populariá basau en PageRank, bahu la premisa de que las páhinas mas deseás eran mas atihás pol otras páhinas qu'el restu. Esta idea premitió a Google ordenal las páhinas dun determinau landeu en hunción de la su emportáncia, basá neste algorimu, estu es, las páhinas mas atihás pol otras páhinas se muestraban en primel lugal. La entrihazi menimalista e Google se hizu mu populal entri los usuárius i dendi altonci á tiniu un gran númiru d'imitaoris.

Google i albondus otrus landerus nu solu gastaban PageRank, sinu mas de 150 critérius pa determinal la emportáncia duna páhina.

Virgilio.it

Landeru italianu que sirvi pa landeal tamién en castillanu. Potenti i con un entrihazi agradabri.

Yahoo Search

En 2004, Yahoo! empuntó el su própiu landeru basau nuna mestura e tenulohias de las sus compras i proporcionandu un servíciu nel que ya prevalecia el landeu en Webs sobri el diretóriu.

Microsoft

El mas recienti de los grandis landerus es Live (enantis MSN Search), de Microsoft, que previamenti dependia d'otrus pa listal los sus landeus. En 2004 empuntó una velsión beta colos sus própius resurtaus, impulsau pol su própiu robot (llamau msnbot). Al préncípiu e 2005 encetó la velsión definitiva.

Uguañoti el mercau está dominau pol Google, Yahoo i Microsoft. El restu de grandis landerus tiendin a sel portalis que muestran los resurtaus d'otrus landerus i ofrecin, amás, otra crasi e contenius que tiinin mayol u menol emportáncia ena páhina, cumu hazi el própiu Yahoo!

Noxtrum

Noxtrum hue el primel motol de landeu global diseñau pol una impresa española, Telefónica Publicidad e Información, S. A. (TPI), empuntau al mercau en velsión Beta el 1 e Diciembri de 2005. Realizaba landeus en internet del mundu ispanupalranti.

Noxtrum partia de la implementación de FAST pa costruil el su própiu motol de landeu, colo que rialmenti nu contaba con tenulohia de landeu própia, sinu que adataba al castillanu la tenulohia gastá nel su dia pol escrucaoris cumu AllTheWeb, ogañu propieá e Yahoo.

El 3 d'Abril de 2008 el landeru ehó de estal operativu, endispués de que Yell lo mercara huntu con Páginas Amarillas i reestruturara la su cúpula diretiva.

Rollyo

Es un landeru nu mu compretu peru sirvi para diversus landeus, la mayoria las sus páhinas son en ingrés, a menus qu'el landeu s'especifiqui en español, es un landeru ondi se puein alcuentral várias páhinas ondi esté la enhormación landeá, cuenta con atihus diretus a las páhinas d'enterés ondi asiahal lo que se landea; es efetivu pa landeus prehisus.

Ask

Ask es un landeru ondi se puei perguntal (cumu izi el su nombre en ingrés "ask" es perguntal) al tentu delo que se landea, ya sea la respuesta a una dua u simprienti alcuentral angún archivu en concretu.

Buscanding

Potenti landeru vertical de casas basau ena tenulohia de heritrix, posei el rahu de trashormal las consurtas a lenguahi natural.