Minermu

Minermu (en griegu Μίμνερμος) hue un cantautol i frautista griegu.

Via

Pocu u ná se sabi de la via desti cantautol. S’inora la fecha la su nacéncia, duandu entri dos possibris cronolohias: una tardia que lo enquairaria entri los primerus líricus ena segunda metá el sigru VII i otra mas recienti a primerus el sigru VI. Abemus datus proceentis del léssicu Suda, anque n’assolutu son crarus. Asseñala la 37 olimpiá ena que γέγονε, es izil, entri los añus 632-629 puu bel naciu u puu arcançal la frol la via que pa los griegus andaba pa los 40 añus.

Nesti mesmu léssicu se dis que hue paí ihu dun tal Licirtiadi i da cumu possibris lugaris nacéncia Colofón, Esmirna (ciais hónias) u Astipalea. Polo heneral se crei sel de Colofón.

Ena Antigüeá hue mu apreciau pola sensualiá los sus puemas, huendu el pueta γλυκύς (u λιγύς en parabras la Suda) "duci" pol esceléncia.

Obra

Testu Minermu

Minermu puu bel escrebiu muchas obras cumu assigura el léssicu Suda, peru hue anombrau mas bien polos sus puemas eróticus i pol el cantu hundacional a Esmirna. Se conoci qu’escrebió en ton épicu un largu puema con el nombri Esmirneida. Esti bichu hazi emparentalu con Esmirna, anque nu quieri izil estu que naciera allí. Hueraparti desti puema del que mas ná sabemus acetus essíguus cachinus, Minermu cautivó la elehia compusiendu sensualis dísticus andi tiempu, belleza, amol, vehés i muerti s’enfrontilan entri ellus i ellus atihaus al apegu al cuelpu. Estus pueminas s’arrecohierun antañu nun libru entitulau Ναννώ (Nanu).

Abreviaturas

Esti autol, hormi al Liddell-Scott, alcibi l’abreviación "Mimn." del su nombri latinizau Mimnermus.

Bibliografia

• Suidae Lexicon, ed. Ada Adler, Stuttgart 1967.
• VV. AA., Antología de la poesía lírica griega, entrod. i trad. C. García Gual, Alianza, Mairil, 2001.

Atihus

• Tradución el cachu 1 al estremeñu