Nacionalismu estremeñu
El Nacionalismu estremeñu es un movimientu político pocu desenroau d'Estremaúra.
Ogañu no dessistin movimientus del tó nacionalistas olganizás ni partius nacionalistas rustrius (tuviendu en cuenta aquellus que recraman ativamenti el reconocimientu comu nación d'Estremaura u enclusu, en algún casu, el derechu d'autodeterminación), enque á essestiu ententus pa crial movimientu, mas allá del regionalismu, que no án ahilau). No estanti, el PREx de Coalición Extremeña (PREx-CREx), en 2007, empençó a reconocel el caraiti nacional d'Estremaura[1][2] (enque sin hazel muchu hincapié en ellu, comu demuestra el hechu de que no aiga renunciau a la etiqueta de "regionalista" ni aiga cambiau entovia la letra "R" las sus sigras oficialis que representa la parabra "regionalista").
Los nacionalistas u soberanistas estremeñus suelin tenel, a menú, unas posturas mas reivindicativas házia la luenga estremeña qu'el regionalismu.
Según las encuestas, los estremeñus están entri los que más identificaus izin sentilsi con España u enclusu a la cabeça en esti espetu. Pero, sin embargu, enas encuestas del CIS, a la pregunta de cómu d'ergullosus se sientin de pretenecel a Estremaúra, los resultaus están entri los más altus, igualaus a los de asturianus i canárius (los más avançaus en essi espetu junta ceutíis i melillensis). Amás, a la pregunta de quantu de españolis u estremeñus se sientin comparandu un sentimientu con el otru, los resultaus no endicavan una menol concéncia local estremeña que en según qué algotras comuniais, i, mesmu, eran mas favorabris a un supuestu nacionalismu estremeñu n'angunus añus nel CIS que pa otras comunidais autónomas con nacionalismus olganizaus comu Andaluzia u Aragón, huendu el polcentagi de genti que se consiera namás española u mas española qu'estremeña sensibrimenti mas baju qu'en lugaris comu Andaluzia, la Comunidá Valenciana, Múrcia, las Castillas u mesmu Galícia. En una encuesta de CEPS-multiprofessional, nel añu 2005 el 4'2% los estremeñus encuestaus ijun sentilsi "sólo extremeño",[3] mentris qu'enas encuestas del CIS la cifra á variau entri el 0'6% i el 3%.
En 1999 de horma anegótica s'iscrivió en el rustriju partius políticus el "Bloque Nacionalista Extremeño".[4]. Ciertas movicionis d'estrema-esquierda de andal estremeñu comu el BPEX enos añus 80 tuvun relacionis con otrus movimientus soberanistas u independentistas d'esquierda d'otras zonas.[5] Amás, en 1986 el Bloque Extremeñista Revolucionario tinia l'alcaldia Majás de Tiéta.[6]
Huentis
Edital- ↑ Manifiesto político del PREx en un espacio del Coordinador General de Coalición Extremeña
- ↑ El Coordinador General de Coalición Extremeña afirmando en su blog estar plenamente convencido de que Extremadura es una nación
- ↑ Resultados de encuesta de CEPS-Multiprofesional en Extremadura. Embaju del toó se mencionan los resultaus referíus al sentimientu español y estremeñu entri los estremeñus.
- ↑ «Registro de partidos políticos del Ministerio del Interior por orden alfabético». Archivado desde el original el 13 de febrero de 2008. Consultado el 24 de septiembre de 2009.
- ↑ El Bloque Popular Extremeño asistió junto al PSAN, Herri Batasuna y BNG al mitin de UPC (Unidad Popular Castellana) en Villalar.
- ↑ El alcalde de Majadas de Tiétar, del Bloque Extremeñista Revolucionario, convoca una reunión de Colectivos sociales y políticos reclamando la paralización de la central nuclear de Almaraz.(El País)