Parabra

Una parabra (del latín parabŏla)​ es ca unu delos segmentus limitaus pol delimitaoris ena caena palrada, escrita o pol señas, que puei aparecel en otras posicionis i que está dotau duna hunción. Es una unida dela luenga que resulta mu fácil de identifical, tantu ena palra, enas señas, cumu ena escreviura.

Lingüísticamenti, el concetu de parabra es muchu más probremáticu delo que la definición anteriol sugieri. En efetu, determinal qué constitui fonéticamenti o morfosintácticamenti una parabra es un probrema abiertu; asín pol ejemplu, huntu a los morfemas ligaus i las parabras léxicas existin los clíticus cuyu estatus de parabra es discutiu. Ena caena palra ordinariamenti no existin pausas i la prosodia es un fatol clavi pa que el oyenti perciba la segmentación de parabras de ca frasi.

La rama dela lingüistica que estudia la composición i estrutura interna delas parabras es la morfología. La parabra puei dividilse en otras unidais menoris que tamién tinin significau, los morfemas, que son unidais lingüísticas más pequeñas con significau. De la mesma manera, los morfemas se puein dividil en otras unidais aún menoris, cumu los fonemas, peru que nu tinin significau.

Ena palra i ena escreviura se combinan unas parabras con otras, hormandu unidais mayoris i complejas denominas grupus sintáticus, talis cumu los sintagmas, peru aún se puei amplial más alcançandu las oracionis i el discursu.