Ríu Gangis

El ríu Gangis o Tanga —ena idioma sáscrita i ena huerça delas lenguas indias, gáṅgā, que senifica 'vai, vai', es dizil, 'que se muevi con ligereza'; ena escreviúra devánagari, गंगा; nel sistema IAST de trasliteración, gaṅgā— es un ríu assitiau nel sucontinenti indiu que discurri pol meyu dela India i de Bangladés. El ríu, de 2525 km, tien nacencia ena parti ocidental dela sierra'l Imalaya, nel estau indiu de Uttarakhand, i ahila pal sul i pa salienti por mé delos plaus i tierras úmidas d'alreol dél propiu i del Indu. Endispués d'entral-si en Bengala Ocidental, se separa n'otrus dos ríus: el Hooghly, o Adi Ganga, que s'aboca ena baía de Bengala, cerquina dela isla Sagal; i el Padma, que discurri por Bangladés, i s'ajunta al Meghna, muriendu mesmu ena baía de Bengala. L'abocaúra, ala qu'allega tamién el Brahmaputra, horma'l delta del Gangis, el delta más grandi'l mundu, conocíu comu los "Sundarbans" ('los bosquis lindus'), región enllenita d'alameas mu espesas andi vivi'l tigri de Bengala.

Atardecía nel Gangis.

Mapa'l cussu'l Gangis.

Alreol del Gangis vivin unus pocus de cientus de millonis de pressonas (quasi qu'una de cada dies del mundu, concretamenti). L'induísmu lo considera'l ríu más sagrau'l mundu i ca añu millonis de pressonas acuyin pa él pa bañal-si enas sus aguas, mesmu pa moril, en creyendu qu'assina podrán compretal el ciclu dela rencarnación. No estanti, es unu delos ríus más enguarraus del mundu i echa al Oceanu Índicu una hartá de restus contaminantis.