Riu Oká

El riu Oká (en russu: Ока) es un riu de la Russia europea, el segundo afluenti más grandi del riu Volga, tras el Kama. Tieni un longor de 1495 km (9° más largu d'Uropa) i drena una cuenca de 245 000 km². Almenistrativamenti, discurri polas óblast de Oriol, Tula, Kaluga, Moscú, Riazán, Vladímir i Nizhni Nóvgorod.

Juntaeru del Oká i el Volga en Nizhni Nóvgorod

Origin del nombri

La puenti Kanávinski sobre el riu Oká en Nizhni Nóvgorod

L'origin del nombri nu está mu craru, inque las prencipalis ipótesis son las otras:

• Max Vasmer aparexa el nombri del riu conel аƕа góticu, el antiguu altu alemán aha, en latín aqua, que en tolos casus cebi tantu «agua» como «riu» (como por exemplu, el riu Aa).
• Oleg Trubachiov sostriba un origin bálticu: Aka cabi, en lituano, «juntana», i lo atribuyi ala tribu delos Galindians, que vivían ena parti ocidental dela cuenca del Oká dantis dela llegá delos eslavus;
• la ipótesis dun origin finlandés: Yoki significa, en finés, «riu». Más inanti, ata la llegá delos eslavus al cursu del Oká, el cursu cimeru estaba ocupau por tribus bálticas (Poleji), mientris qu'el cursu meyu i baxeru estaba abitau por finlandessis (Meschiora i Múroma).

Geografia

Cuenca del riu Oká (en amarillu claru)

El riu Oká naci ena región delos Altus Centralis, nun veneru nel puebru d'Aleksándrovka, ena parti meridional dela óblast de Oriol, al sul de Glazunovka. El riu discurri primeru en direción norti, nun trancajilau dunos 300 km, inque mu prontu çamarguilli la capital, Oriol (333.310 abitantis. en 2002). Tras atravesal de sul a norti la óblast d'Oriol, acebi pola derecha el riu Zusha i jorma, duranti un corto cachu, la raya natural conel óblast de Tula, província que cruza a continuación por su estremu ocidental, tamién de sul a norti. Neste discurril por Tula atraviessa la ciá de Beliov (16.083 ab.) i recibi pola derecha al riu Upa (345 km).

Endispués s'adentra ena óblast de Kaluga por su parti centrocidental, acebiendu pola gacha al comiençu al riu Zhizdra (223 km) i alogu al riu Ugrá (399 km), un puntu nel que el riu Oká ladea con decissión pal esti. Aporta pocu endispués ala capital Kaluga (334.751 ab.) i pocus kilómetrus aguas abaxu se meti ena óblast de Tula, discurriendu por su parti ocidental. Passa afrenti d'Aleksin (68.256 ab.) pa hazel aluego una cumpria retortuña en direción noroesti, un cachi nel que su cursu hazi otra ves raya natural cola óblast de Kaluga. Acebi pola gacha al riu Tarusa i al riu Protvá i aluegu entra ena óblast de Moscú por su parti meridional. El riu se encarama hazia el esti, atraversandu las localiais de Protvinó (36.175 ab.) i Sérpujov (131.097 ab.), ondi recibi pola gacha al riu Nara (158 km). Sigui aguas abaxu por Kashira (40.898 ab.), Púschino (19.964 ab.), acibi pola derecha al riu Osiotr (228 km) i s'a llega a Kolomna (150.129 ab.), ondi recibi pola gacha al riu Moscova, que vieni dendi Moscú.

El riu Oká empendola la óblast de Moscú por su lau ocidental pa entral ena óblast de Riazán, ondi passa a frenti ala capital Riazán (521.560 ab.). Aluegu hazi una amplia curva pola parti meridional dela región de los baxus empantanaus de Meschiora, cogiendu a continuación direción noresti. Acebi pola chova al riu Pra (192 km), alogu atraviessa la ciá de Kasímov (35.816 ab.) i empendola la óblast por su parti septentrional. Sigui pola óblast de Vladímir, ondi baña Múrom (126.901 hab.) i al pocu acebi pola derecha al riu Tiosha (311 km). Pa la postri, se meti ena óblast de Nizhny Nóvgorod, atravessandu Pávlovo (64.814 ab.) i acibiendu pola isquierda uno de sus más emportantis afluentis, el riu Kliazma (686 km). Sigui alogu polas ciais de Naváshino (17.810 ab.), Gorbátov (2.662 ab.), Dzerzhinsk (261.334 ab.) i ena boca conel riu Volga, Nizhni Nóvgorod (1.311.252 ab.).

L' anchor mássimo del río es dunos 25 km en su cursu meyu. El caudal mey es de 1300 m³/s, con un régimi pluvial.

Sitius emportanciosus

Las orillas del riu están chalpicás con a gallonis sitius d' emportancia estórica i cultural, concruíus los monesterius medievalis de Múrom, las mezquitas i minaretis de Kasímov, los kremlins fortificaus de Kolomna i Sérpujov, las casa-monumentu del pintor Vasili Polénov i del pueta Serguéi Esenin, los escavochus delas ruinas dela vieja Riazán i la Torri de Shújov nel riu Oká.

La Reserva natural Prioksko-Terrasni s'atopa alo largu dela orilla gacha del riu, afrenti ala localiá de Púschino i es conocia por su viveru de crías de bisonti.

Navegación

El riu Oká es navegabli dendi la ciá de Chekalin, i por tránsitu, endispués de Kolomna, es izil, dendi la boca del riu Moscova. El riu tieni regulau el caudal por mé d'esclusas 100 km aguas abaxu del conanau del Moscova. Ata la década de 1960, el riu Oká era navegabli dendi Oriol, inque únicamente ena dereción dela corrienti i en tiempu de crecias, o bien por mé dela ayuda de diferentis pesqueras del riu.

Véase tamién

• Torri de Shújov nel riu Oká

Atijus externus

• En Commons ai conteníu multimedia sobre Riu Oká.