Teatru romanu
El teatru romanu es una costrución típica el Empériu Romanu, assitiá en tolas províncias del empériu, i que tinia la finaliá e servil pal entelpretaeru d'atus teatralis del periu crásicu.
Teatrus, anfiteatrus i circus romanus Edital
La pulítica e romaniçación de los puebrus conquistaus hizu que se costruyeran teatrus romanus, asín cumu anfiteatrus, circus, forus i templus, con semilaris caraterísticas en tol empériu, dendi Hispania hata Orienti Meyu. Desistin ciertas semehanças entri circus, teatrus i anfiteatrus de l'antigua Roma. Tos se construyerun con los mesmus materialis —piera i morteru romanu— i tinian pol finaliá servil al óciu ciaanu pol meyu el espetáculu. Sin embargu, ca unu tinia huncionis i horma deferentis:
- El circu romanu se gastaba palas carreras de caballus.
- El anfiteatru romanu se gastaba palas runchas de gladiaoris.
- El teatru romanu tinia pol ohetu acohel representacionis d'obras teatralis, griegas i romanas.
Estrutura el teatru Edital
Las caraterísticas prencipalis del teatru romanu derivarun nun prencípiu e las del teatru griegu, ya que albondas las caraterísticas heneralis de l'arquitetura romana derivan diretamenti de l'arquitetura el periu helenísticu.
Los primerus teatrus se construyerun en maera. Éstus se barrundian endispués de qu'el acontecimientu pal cual huerun costruius acabihara. Una lei empiia costruil teatrus remanentis. Sin embargu, nel 55 edC se costruyó el Teatru e Pompeyu con un templu pa evital la lei.
Con el pasu el tiempu, los teatrus romanus esarrollarun caraterísticas específicas. La mayol parti los teatrus romanus conservaus siguin el moelu arquitetónicu prepuestu pol Vitrubio, costandu e:
- Scenae frons (frenti escénicu), normalmenti compuestu dun dobri ordin de colunas.
- Orchestra: semicérculu assitiau frenti a la escena nel que se sentaban las autoriais.
- Aditus: pasillus lateralis d'entrá a la orchestra.
- Cavea: Estrutura semicerculal ena que, sigún el rangu social, s'assitiaban los espetaoris. Se deviia en ima cavea, media cavea i summa cavea.
- Vomitoria: Entrás aboveás polas que s'aceia a la cávea.
- Proscaenium (proscéniu): Espáciu delantri la escena nel que s'esarrollaba l'ación dramática.
- Porticus post scaenam (Pórticu detrás de la escena): Pátiu porticau con colunas detrás de la escena.
En angunus teatrus puia apoyal la cávea sobri galerias aboveás, mentris qu'en otrus, los arquitetus aprovechaban la laera d'angún lombu pa escaval nella la cávea el teatru.
El teatru pudria cubrilsi con toldus pa protehel a los espetaoris de la llúvia u e la lús el sol.
Amás, una tupa teatrus mantenian pequeñus templus ena su estrutura.