Termodinámica

La termodinámica (del griegu θερμo-, termo, que senifica "calol" i δύναμις, dinámicu, que senifica "huerça") es una rama de la física qu'estuya los efetus de los cámbeus de la temperatura, presión i volumin delos sistemas físicus a un nivel macroscópicu.

La termodinámica se basa en leis estabelecias esperimentalmenti:

• La Lei Ceru de la Termodinámica determina que, quandu dos cuelpus tienin igualdá de temperatura con un tercel cuelpu, ellus tienin igualdá de temperatura entri si. Esta lei es la base pa hazel las medicionis de temperatura.

• La Primera Lei de la Termodinámica estableci que si se realiza labutu sobri un sistema o bien esti entercambea calol con algotru, la nirgía enterna del sistema cambeará. Tamien es conociu comu el prencipiu de la conservación de la nirgía: "La nirgía del Universu es constanti".

• La Segundera Lei de la Termodinámica determina l'aspetu cualitativu de procesus en sistemas físicus, estu es, los procesus tienin lugal nuna cierta direción mas non puein sucedel ena direción opuesta. Enunciá pol Clausius del siguienti modu: "La entropía del Universu tiendi a un máissimu".

• La Tercera Lei de la Termodinámica estableci qu'es emposibli arcançal una temperatura igual al ceru asolutu medianti un númeru finitu de procesus físicus. Es estremadamenti útil nel analisis termodinámicu de las reacionis quimicas, comu la combustión, por ejemplu.