Andorra

El Prencipau d'Andorra (Principat d'Andorra en catalán), es un chiquininu país montañosu i sin costa assitiau enos Pirineus, entri España (hiziendu arrayu cona comunidá autónoma de Cataluña) i Francia. Duranti muchu tiempu probi i aislau, á conseguiu una notabli prosperiá dendi la II Guerra Mundial por mol del turismu i la su condición de paraisu fiscal.

Nu tien huerças armás, de la su defensa están encargás España i Francia.

Geografia

Imahin satéliti d'Andorra

Coincidiendu cona su situación nel esti la cordillera los Pirineus, Andorra consisti predominantimenti nuna serii montañas costanas con una cimeria meya de 1996 m, i con 65 picus de mas de 2.500, siendu la Comapedrosa el su puntu mas elevau, con 2946 m. Las montañas horman tres vallis angostus en horma d'Y que aluegu se combinan nunu solu por ondi pasa el prencipal riu, Valira qu'endespues sali del pais pa entral en España, por el puntu mas bajeru d'Andorra que s'assitia a los 870 metrus d'altitú.

Climi

El climi d'Andorra es apaeciu al de los sus vecinus, peru conas conotacionis que tien la particulal situacion del pais, ena alta montaña pirenaica: suavi en vranu i mu friu nel invielnu, con abudantis precipitacionis a lo largu de tol añu.

Tien tres o cuatru nevazus huertis tolos añus. Nel invielnu la temperatura oscila entri los -1 a -7 gradus; nel vranu las temperaturas puedin arcançar e 21 a 27 gradus.

Goviernu i política

Casa de la Vall, sedi el Parlamentu d'Andorra

Andorra es un co-prencipau parlamentáriu consitucional. La Constitución d'Andorra s'aprobó el 14 Marçu 1993.

La jefatura del Estau residi enus copréncipis, uno l'obispu e Seo d'Urhel i el otru el presidenti de Fráncia, por qu'es la heredera del Condi de Fox.

El Conseju General es el órganu legislativu i se trata dun parlamentu unicameral e representación mista i paritária de la puebración nacional i de las sieti parroquias, compuestu por 28 miembrus elejius ca cuatru añus.

El Goviernu es el órganu ehecutivu. Ogañoti está compuestu por el Jefi de Goviernu y onci menistrus.

Nultimu lugal están los Comuns, que son órganus e representación i almenistración civil de las parróquias, que se puei izil que son equivalentis a los ayuntamientus.

Organiçación políticu-alministrativa

Parróquias d'Andorra

Andorra está deviia territorialmenti en sieti parróquias cuyu ordin protocoláriu es:

Canillo. Parróquia mas estensa del pais.
Encamp. Parróquia nel corazón del país.
Ordino. Parróquia mas al norti del país.
La Massana
Andorra la Vella. Parróquia mas puebrá, cuya ciá prencipal es la capital del pais.
Sant Julià de Lòria. Parróquia mas al sul del pais (arrayu español).
Escaldes-Engordany. Parróquia mas recienti (hormá en 1978).

Tamién, las parróquias d'Ordino, La Massana i Sant Julià e Lòria están deviias en quarts i la de Canillo en veïnats. Amás non se descarta la posibiliá de qu'El Pas de la Casa, qu'ogañu horma parti de la parróquia d'Encamp, constituya algún dia l'octava parróquia.

Demografia

Pas dela Casa

Los andorranus constituyin una minoria nel su pais; namás el 36,65% de los abitantis son de nacionaliá andorrana. El grupu más grandi de foritus es el de los españolis, (38,27%) [catalanis, castellanus i gallegus prencipalmenti], con purtuguesis (11,49%) i francesis (6,52%) comu los otrus grupus prencipalis. El restanti 7,15% pertenci a otras nacionaliais.

La única luenga oficial es el catalán, inque tamién se palra español, purtugués i francés. La religión predominanti es el catolicismu romanu.

Atijus

En Commons ai conteníu multimedia sobre Andorra.

Paisis d'Uropa