Espurgabuei

Espurgabuei (Bubulcus ibis)
Otrus nombris:	Espulgabuei, picabuei
Destribución
Crassificación científica
Reinu	Animalia
Filu	Chordata
Crassi	Avis
Ordin	Pelecaniformis
Familia	Ardeidae
Géneru	Bubulcus
Especii	Bubulcus ibis
Autol
Linaeus, 1758
Estau de conservación
Conservación deEspurgabuei

El espurgabuei [eʰˌpʰuɾɣaˈβ̞u̯ei̯] (nom. cient. Bubulcus ibis) es una especii de garça campera, prencipalmenti insetívora, enque tamién puei comel pecinus i sapus. Es nativa dela península Ibérica i del norti d'África.

Morfología

Esta especii midi pa 46-56 cm d'altu i puei llegal ata los 96 cm d'envergaúra. Pesa entre 270 i 512 gramus. El pescueçu es cortu, hechu un corvillu quandu está apossau. El picu es amarillu i huerti, apreparau pa pical ena tierra o en el lomu de angunus animalis del campu. Los ojus con una postura de vista binoculal tamién están apreparaus pa vel al pardeal i mesmu de nochi. Las prumas son brancas i las piernas amarillinas.

No ai mucha deferencia entre dambus dos sessus, enque el machu es ligeramenti más grandi i con más prumagi quandu la reprodución que las hembras. Los boqueronis son escurus i con el picu negru.

Comportamientu

El espurgabuei aposau nun animal

El nombri d'espurgabuei le vien por sel una crassi de garça insetívora que está cerca del ganau bovinu en cata de bichinus. Tamién se puei vel, junta otras avis comu las cigüeñas, quandu rompin las tierras conos araus i los tractoris, ya que al revolvé-la, melucas i otrus bichinus están más ala vista.

La queá la hazin cerca delos sitius ondi tienin abondancia de comía, aposaus en árvolis, cordonis o techus.

Esparramamientu

Enque el su origi está en el sul d'Uropa i norti d'África, duranti el sigru XIX i XX tamién prencipió a vel-si en América. Estu has que la su aria d'acupación abarqui abati los 10 millonis de quilometrus quairaus.