Molécula
En química, una molécula (del nuevu latín molecula, qu'es un diminutivu la palabra molis, 'massa') es un grupu eléctricamenti neutru y suficientementi establi d'al menus dos átomus en una configuración definía, uníus por enlacis químicus huertis (covalentis o enlaci iónicu).[1][2][3][4][5][6]
En esti estrictu sentíu, las moléculas se diferencian de los ionis poliatómicus. En la química orgánica y la bioquímica, el términu "molécula" s'utiliza de manera menus estricta y s'aplica tamién a los compuestus orgánicus (moléculas orgánicas) y en las biomoléculas.
Endenantis, se definía la molécula de forma menus general y precisa, comu la más pequeña parti d'una sustancia que pudía tenel existencia independienti y establi conservandu aún las sus propiedáis fisicoquímicas. D'acuerdu con esta definición, pudían existil moléculas monoatómicas. En la teoría cinética los gasis, el términu molécula s'aplica a cualquier partícula gaseosa con independencia de la su composición. D'acuerdu con esta definición, los átomus d'un gas nobli se considerarían moléculas manqui se componen d'átomus no enlazaus.[7]
Una molécula puei consistil en varius átomus d'un únicu elementu químicu, comu en el casu del ossígenu diatómicu (O2),[8] o de diferentis elementus, comu en el casu del áugua (H2O). [9]Los átomus y complejus uníus por enlacis no covalentis comu los enlacis d'idrógenu o los enlacis iónicus no s'estilan consideral comu moléculas individualis.
Las moléculas comu componentis la materia son comunis en las sustancias orgánicas (y por tantu en la bioquímica). Tamién conforman la mayor parti los océanus y la atmósfera. Sin embargo, un pazu númeru de sustancias sólidas familiaris, qu'incluyin la mayor parti los mineralis que componen la corteza, el mantu y el núcleu de la Tierra, contienin una hartá enlacis químicus, pero no están formaus por moléculas. Además, ninguna molécula típica puei sel definía en los cristalis iónicus (salis) o en cristaleis covalentis, manqui estén compuestus por celdas unitarias que se repitin, ya sea en un planu (comu en el grafitu) o en tres dimensioneis (comu en el diamanti o el cloruru de sodiu). Esti sistema de repetil una estructura unitaria varias vezis tamién es válida pala mayoría las fasis condensás la matéria con enlacis metálicus, lo que significa que los metalis sólidus tampocu están compuestus por moléculas. En el vidriu (sólidus que presentan un estau vítreu desordenau), los átomus tamién puein estal uníus por enlacis químicus sin que se puea identifical ningún tipu de molécula, peru tampocu existi la regularidá la repetición d'unidáis que caracteriza a los cristalis.
Casi toa la química orgánica y güena parti la química inorgánica s'ocupan de la síntesis y reactividá de moléculas y compuestus molecularis. La química física y, especialmenti, la química cuántica tamién estudian, cuantitativamenti, en el su casu, las propiedáis y reactividá las moléculas. La bioquímica está íntimamenti relacioná con la biología molecular, ya que ambas estudian a los seris vivus a nivel molecular. El estudiu las interacionis específicas entri moléculas, incluyendu el reconocimientu molecular es el campu d'estudiu la química supramolecular. Estas huerzas explican las propiedáis físicas comu la solubilidá o el puntu d'ebullición d'un compuestu molecular.
Las moléculas rara vezi s'encuentran sin interación entri ellas, salvu en gasis enrarecíus y en los gasis noblis. Asína, puein encontralsi en redis cristalinas, comu'l casu las moléculas de H2O en el hielu o con interacionis intensas pero que cambian rápidamenti de direcionalidá, como en el áugua líquida. En ordin crecienti d'intensidá, las huerzas intermolecularis más relevantis son: las huerzas de Van der Waals y los puentis d'idrógenu. La dinámica molecular es un métodou de simulación por computadora qu'utiliza estas huerzas pa tratal d'explical las propiedáis las moléculas.
Guípesi también
EditalHuentis
EditalReferéncias
Edital- ↑ Unión Internacional de Química Pura y Aplicada: (1994) /M04002.html molecule, Compendium of Chemical Terminology, conocido como Gold Book.
- ↑ Pauling, Linus. "General Chemistry". (1970). ISBN 0-486-65622-5
- ↑ Ebbin, Darrell, D. "General Chemistry, 3th Ed." (1990). ISBN 0-395-43302-9}}
- ↑ Brown, T. L. "Chemistry - the Central Science, 9th Ed." (2003). ISBN 0-13-066997-0 }}
- ↑ Chang, Raymond. "Chemistry, 6th Ed." (1998). ISBN 0-07-115221-0
- ↑ Zumdahl, Steven S. "Chemistry, 4th ed." (1997). ISBN 0-669-41794-7
- ↑ "Comprehensive Inorganic Chemistry". Chandra, Sulekh. ISBN 8122415121
- ↑ Thibodeau, Gary A. "Estructura y función del cuerpo humano". https://books.google.es/books?id=3tdLbY3FA4AC&pg=PA25&dq=mol%C3%A9cula+varios+%C3%A1tomos+%C3%BAnico+elemento+qu%C3%ADmico&hl=es&sa=X&ved=0ahUKEwjInpeVmo_ZAhVKbhQKHTLjAPIQ6AEIJzAA#v=onepage&q=mol%C3%A9cula%20varios%20%C3%A1tomos%20%C3%BAnico%20elemento%20qu%C3%ADmico&f=false Patton, Kevin T.
- ↑ Vaquerizo, Dulce María Andrés. "Ciencias aplicadas a la actividad profesional 4º ESO". https://books.google.es/books?id=yA7-CwAAQBAJ&pg=PA45&dq=mol%C3%A9cula+varios+%C3%A1tomos+de+diferentes+elementos&hl=es&sa=X&ved=0ahUKEwiz793Emo_ZAhWGtxQKHZeOCScQ6AEIJzAA#v=onepage&q=mol%C3%A9cula%20varios%20%C3%A1tomos%20de%20diferentes%20elementos&f=false ISBN 9788490788097
Bibliografía
Edital- Gustafson, S. J. & I. M. Sigal (2011): Mathematical Concepts of Quantum Mechanics, Springer-Verlag, ISBN 978-3-642-21866-8.
Atijus
Edital
En Commons ai conteníu multimedia sobre Molécula.- Estructura las moléculas a través de los cristalis.
